A brigada de Medio Ambiente completa estes días o desbroce do sendeiro do Arenteiro por ambas marxes do río. Neste labor participan catro operarios que van equipados con máquinas desbrozadoras manuais e unha máquina cortacésped.
No traballo de desbroce tense o máximo coidado de salvaguardar o ecosistema, de modo que non afecte á flora e fauna propias das ribeiras do Arenteiro.
O sendeiro do Arenteiro ten, dende a Ponte de Veiga ata a Piscifactoría, unha lonxitude de 3 km, polo que o percorrido por ambas marxes é de 6 km, e supón, xunto co parque municipal, unha das zonas verdes máis extensas do Carballiño.
O sendeiro é moi frecuentado por camiñantes e deportistas durante todo o ano, pero con maior incidencia neste tempo de primavera e durante o verán.
