A compañía Malasombra Producións trae este sábado, 27 de xaneiro, o espectáculo musical infantil e familiar “Os Rockenstein”. A representación terá lugar ás 6 da tarde, e o prezo da entrada é de 3,50 euros. Este evento está organizado pola concellería de Cultura dentro do programa da rede de teatros de Galicia.
Sinopse:
O doutor Rockenstein é un gran profesor, un gran científico, un inventor, pero tamén é un melómano consciente de que a boa música está desaparecendo do planeta. Para remedialo, no seu laboratorio decide crear un ser vivo, unha criatura e convertela nunha verdadeira estrela musical que salve ó mundo da desaparición do Rock´n Roll, e para iso, mestura na súa máquina de experimentos os ingredientes necesarios para crear unha estrela do rock: Un disco dos Kiss, un póster dos Rolling Stones, un calcetín do guitarrista de ACDC, un rizo de Tina Turner, unha chapa de Rosendo…
O experimento resulta ser un éxito aínda maior do que agardaba, pois da súa máquina de experimentos musicais non só sae unha criatura futura estrela do rock: saen tres! Unha criatura masculina e dúas femininas, cuxo nacemento o doutor Rockenstein acolle con entusiasmo e rapidamente empeza a súa ardua tarefa: educar ás futuras estrelas do rock, para que se formen antes como persoas que como rockeiros.
Esa educación será a través das nove cancións que compoñen este musical, e na que continuamente se pedirá a participación dos espectadores e espectadoras, teñan a idade que teñan, para que o transcorrer do espectáculo se aproxime á sensación de estar asistindo a un concerto de rock.
Por medio desas cancións, ese trío de futuras estrelas do rock aprenderá a importancia de vestirse e asearse, de alimentarse ben, a importancia de aprender cada materia que lles ensinan no colexio , a importancia de saber escoller un oficio, de coñecer o mundo e as xentes tan diferentes que o habitan, e tamén do importante que é aprender a saber coidar de un mesmo cando é necesario.
E unha vez rematada a súa formación, e xa preparadas e preparado para ser estrelas do rock, chega o momento de fundar, xunto co doutor, un grupo de rock que non deixará que o mundo quede sen escoitar bo rock´n roll: OS ROCKENSTEIN.
FICHA
Duración: Sesenta minutos
Intérpretes: Jouse García, Celia González, Sandra Iglesias e Xoque Carbajal
Autor texto: Jose Prieto
Autor música orixinal: Carlos Mosquera
Escenografía e vestiario: Carlos Alonso
Maquillaxe: Trini F. Silva
Iluminación: Xoque Carbajal
Dirección: Marcos Orsi
