O presidente da Confederación Hidrográfica do Miño-Sil, José Antonio Quiroga, realizou hoxe unha visita oficial ao Carballiño para reunirse co alcalde e anunciar diversas accións do organismo que dirixe na vila do Arenteiro.
En concreto, anunciou a limpeza do río e das súas marxes ao seu paso pola vila, e a próxima sinatura dun convenio para financiar un proxecto que inclúe o acondicionamento dos sendeiros que bordean o río Arenteiro dende a Ponte de Veiga ata o parque etnográfico, o acondicionamento do tramo final da baixada da rúa río Miño, a rehabilitación do lavadeiro de Toscaña e a creación dunha área de lecer e xogos infantís neste mesmo barrio.
O proxecto, que terá un custo de 260.00 euros, está xa redactado, e o convenio para o seu financiamento asinarase nas próximas semanas.
Así o manifestou José Antonio Quiroga durante o encontro que mantivo na alcaldía co rexidor carballiñés, Francisco Fumega.
Fumega agradeceu ao presidente da Confederación Hidrográfica a deferencia pola súa visita ao concello e polo apoio no financiamento deste proxecto, que suporá acondicionar os paseos do río Arenteiro e a área de Toscaña, ademáis da limpeza do río e das súas marxes. Ao respecto, o alcalde asegurou que esta limpeza era totalmente necesaria e urxente, pois había zonas moi afectadas pola caída de troncos e ramas, formando incluso empalizadas, así como amieiros completamente secos, que podían caer en calquera momento, e que son dende hai anos parte do problema da acumulación de maleza no cauce fluvial.
En consonancia con esta preocupación, José Antonio Quiroga amosou o seu apoio ao gran patrimonio natural do río e das ribeiras do Arenteiro, do que dixo era un dos pilares da dinámica urbana do Carballiño. Por iso asegurou que a limpeza íase realizar o máis axiña posible, e que tamén se ía asinar a curto prazo o convenio para executar o proxecto completo.
Tras a reunión, ambos dirixentes realizaron unha visita á zona do lavadeiro e do futuro parque infantil de Toscaña, e percorreron un tramo do sendeiro do río na marxe dereita para comprobar “in situ” o seu estado actual, xa que unha parte atópase soterrado e cuberto por herba.
E finalmente, visitaron a fábrica de Papel da Lavandeira, onde se leva a cabo neste intre pola escola-taller de emprego un proxecto de limpeza do entorno e construcción dun edificio que albergará as dependencias administrativas, recepción e aseos do futuro museo do papel.
