Conxugar a educación medioambiental e a robótica é o obxectivo do obradoiro denominado ROBOCCAMB, que patrocinan a concellería de Medio Ambiente e o Centro Comercial Aberto, e que estará dirixido por Cristina González. Desenvolverase o 26, 27 e 28 de decembro, e o 2, 3 e 4 de xaneiro, de 10,00 a 13,00 h., na sala do CCA, na antiga Casa Sindical. As prazas son limitadas, e por iso é preciso inscribirse previamente a través de internet.
Esta actividade foi presentada esta mañá pola concelleira de Medio Ambiente, Érika Paz; o presidente do CCA, Julián Garriga, e a monitora Cristina González.
Érika Paz amosou a súa satisfacción por esta iniciativa, xa que se trata dunha actividade educativa moi importante para sensibilizar aos nenos e nenas sobre a necesidade de respetar o medioambiente para facer un mundo máis sostible. Destacou a dobre faceta de conxugar a robótica co coidado medioambiental e a posta en valor do patrimonio natural do Carballiño como é o parque municipal.
Julián Garriga tamén agradeceu a iniciativa e a colaboración do concello, destacando a importancia da celebración do obradoiro nestas datas do Nadal.
Cristina González incidiu no feito de que non se trata só dunha actividade de ocio, senón que ten unha componente educativa baseada nunha tecnoloxía que integra coñecementos e conceptos a través da robótica. Dixo que se ía traballar en materias como a reducción, reutilización e reciclaxe dos residuos, e que se prestará special importancia ao parque municipal do Carballiño, tanto pola sua flora como pola súa fauna.
