Na primeira semana de apertura da lista para optar ao novo Plan Integrado de Emprego “Carbaemprega 2019”, o número de persoas inscritas é de case setenta. Isto da conta do gran interese que existe no Carballiño e na comarca para participar neste plan de formación e resinserción laboral, que se desenvolverá durante o período dun ano con tres módulos: auxiliar de almacén, forestal e soldadura.
A oficina comarcal do servizo público de emprego de Galicia, que é o organismo que comezará a realizar a selección dentro dunha semana, manterá aberta esta lista ata o remate do prazo, urxindo ás persoas interesadas que presenten as súas solicitudes canto antes.
Tras o éxito acadado este ano 2018 e o anterior, 2017, polos respectivos plans integrados de emprego “Carbaemprega”, hai unha semana abriuse o proceso para a selección dos participantes neste terceiro plan, que ten por obxectivo formar e integrar no mercado de traballo a 100 persoas, sendo o único plan destas características concedido pola Xunta de Galicia para a provincia de Ourense durante o próximo ano 2019.
Dende a concellería de Promoción Económica, que dirixe Adolfo Nogueira, e que promove estes plans co financiamento da Consellería de Economía, Emprego e Industria, anímase a todas as persoas que estean desempregadas actualmente a inscribirse na lista que lles dará opción a participar neste plan.
Ao respecto, o concelleiro lembra que no primeiro plan de emprego conseguiuse reinsertar no mercado de traballo a 41 persoas, e no último a reinserción pode pasar das 50 persoas, superando en ambos casos as previsións iniciais.
