Corenta e catro persoas inscritas no Programa Integrado de Emprego de Galicia “Carbaemprega 2018” comezarán esta semana o curso de soldadura, que é un dos módulos máis solicitados neste terceiro programa de emprego financiado pola consellería de Economía, Emprego e Industria da Xunta de Galicia, que se puxo en marcha o pasado mes de xaneiro. Os outros módulos do programa son auxiliar de almacén e peón forestal.
A apertura do curso, que se desenvolverá nas instalacións do parque empresarial da empresa DIZMAR, celebrouse na Casa da Cultura coa asistencia do alcalde do Carballiño, Francisco Fumega; os responsables da formación, da empresa Eurofirms, e técnicos do departamento de Orientación Laboral do concello.
Nos pouco máis de dous meses que botou a andar o programa, xa conseguiron traballo 22 persoas, o que supón o 22% do total de persoas inscritas, que é de cen. Ao final do programa, que terá unha duración dun ano, o obxectivo de inserción é do 45%. Os sectores nos que se empregaron estas 22 peroas son moi dispares, así temos persoas traballando en hostelería, industria, sector alimentario, administración pública e incluso hai un usuario contratado como investigador nunha Universidade.
Actualmente os usuarios xa finalizaron as formacións en orientación laboral e comezan cos cursos de profesionalización.
O curso que empeza agora é o de iniciación á soldadura con 44 personas na nave de DIZMAR, e máis adiante comezarán os de almacén e peón forestal. A duración deste curso de iniciación é de 30 horas.
Unha vez rematado o curso de iniciación, as persoas que o superen realizarán un curso de perfeccionamento.
Francisco Fumega saudou aos usuarios do programa e recordoulles a importancia deste curso, pois recibirán formación para poder desempeñar un labor profesional no sector industrial. O alcalde animou a facer todo o esforzo necesario para aprender o máximo posible e facer máis rápida a incorporación ao mercado laboral. Neste senso, aleccionou para aproveitar esta oportunidade que lle brindaba o programa posto en marcha polo concello en colaboración coa Xunta de Galicia. Finalmente, agradeceu ao grupo DIZMAR a súa colaboración nesta fase da formación e por implicarse activamente no programa. Tamén agradeceu o traballo de Eurofirms, que é a entidade que se encarga da formación.
OBXECTIVOS DE INSERCIÓN
No primeiro plan de emprego conseguiuse reinsertar no mercado de traballo a 41 persoas, e no segundo o plan a reinserción superou as 50 persoas. Neste terceiro programa agárdase incrementar o número de persoas que consigan un emprego, e que é como mínimo o 45%.
