A vila do Carballiño converterase este sábado e domingo, 18 e 19 de maio, no epicentro da fotografía en Galicia. Trátase do I Maratón Fotográfico que organiza a Asociación Fotográfica O´Potiños de ámbito galego, e que conta coa colaboración do concello do Carballiño e do Centro Comercial Aberto.
Neste concurso os participantes deberán presentar unha selección de fotografías sobre catro temas que non coñecerán ata o mesmo momento do formalizar a súa inscrición, e un de cuxos temas estará relacionado cos establecementos comerciais e hostaleiros pertencentes ao Centro Comercial Aberto. Así mesmo, persigue a finalidade de elaborar un arquivo fotográfico sobre diversos aspectos da vila carballiñesa.
Concederanse tres premios de 500 euros, 300 euros e 100 euros, para os tres primeiros clasificados, e non se descarta incorporar máis premios.
Os concursantes deberán formalizar a súa inscrición mañá, sábado día 18, onde se lle entregarán os requisitos do maratón, e as fotografías deberán presentalas nun CD ao termo do maratón o domingo 19 de maio.
O 27 de maio celebrarase un acto na sala de exposicións do auditorio municipal, onde se entregarán os premios e se abrirá unha exposición coas vinte mellores fotografías.
Está confirmada a participación de fotógrafos e fotógrafas de toda Galicia, según informan desde o colectivo O´Potiños.
