Este mércores día 9 de setembro ás 21 horas temos un acto especial na Insua dos poetas. A Fundación Insua dos poetas organiza unha noite de poesía e música, coa presentación do último libro do poeta José Lameiras e a proxección de catro audiovisuais, un videopoema do propio Lameiras, ás curtas feitas polos alumnos do IES Chamoso Lamas Sons no camiño e O andar da pedra e a mediometraxe A última viaxe do afiador, de Aitor Rei.
José Lameiras é deseñador gráfico, músico e poeta. O seu primeiro libro, Entrega e demolición, foi presentado en New York e na casa de Galicia en Mexico. É o creador e director do festival Imos ter máis que palabras.
Sons no camiño foi a primeira curta realizada polos alumnos do IES Chamoso Lamas no ano 2016, coordinados polo cineasta Ángel Santos e un grupo de profesores do centro. A película foi premiada en diferentes certames e exhibida en varios países. O andar da pedra é a última producción do equipo de audiovisuais deste centro de ensino e foi estreada recentemente no interior do templo da Veracruz, polo que será a segunda oportunidade de visionala.
Xa para rematar, A última viaxe do afiador de Aitor Rei, director e actor ourensán, é un filme que narra a vida errante dos afiadores contada polos seus propios protagonistas.
A duración aproximada de todo o acto será de 2 horas. a entrada e libre e gratuíta ata completar o aforo do auditorio da Insua dos poetas. Durante todo o acto será necesario o emprego de mascarilla e gardar todas as medidas de seguridade sanitaria.
