O concello do Carballiño ven de acondicionar as dúas plataformas do Paseo do río Arenteiro, no Parque Municipal, destinadas á pesca das persoas con discapacidade física, que se atopaban en moi estado dende hai tempo.
O traballo, que foi executado estes dias pasados de Nadal pola brigada municipal de obras, dependente da Alcaldía, consistiu na substitución do piso e das barandelas de madeira por outras novas de ferro, que son máis consistentes e duradeiras, mellorándose tanto a seguridade como a facilidade de acceso para as persoas que teñan que andar en cadeiras de rodas ou teñan algún tipo de discapacidade física.
Estas plataformas, que foron pioneiras na súa época, hai anos que foron construidas e o paso do tempo, así como o uso inadecuado por parte de persoas incívicas, fóronas deteriorando ata o punto de que unha boa parte das madeiras das barandas e do piso estaban rotas. Por isto, atopábanse xa prácticamente inservibles para o uso da pesca polas persoas con algunha discapacidade, que son quen as poden utilizar exclusivamente, tal e como figura nos paneis indicativos que están o seu carón.
Agora, e a falla dalgún detalle que ainda queda por culminar, con esta renovación volven a estar operativas e poderán cumprir a función para a que foron creadas, como é facilitar a práctica da pesca ás persoas con algún impedimento físico.
