O alcalde do Carballiño, Francisco Fumega, asistiu hoxe xunto con representantes de Protección Civil, de Emerxencias e do Parque Comarcal de Bombeiros, a unha demostración do uso dun fusil de Paintball que permite disparar aos niños de avispas asiáticas e deixalos inutilizados. Este sistema está sendo empregado en Cantabria desde fai dous anos cun alto grao de eficiencia, segundo din os representantes da empresa “Asiatic Wasp Ball”.
Trátase dun fusil que dispara unhas bolas (vectores conxelados) nas que se introduce o veneno que, unha vez disolto dentro do niño, mata ás avispas e inutiiza o niño. Segundo os representantes desta empresa, que asegura que O Carballiño será o primeiro concello de Galicia en usar este sistema, o 95% das veces o niño queda tratado á primeira, non sendo necesaria unha segunda actuación.
Este sistema permite ademáis alixeirar o equipamento, pois só precisa transportar un maletín co fusil e unha caixa coas bolas conxeladas en xeo seco ou neve carbónica. Tamén posibilita atacar niños en moita altura e con maior seguridade, e resulta moito máis rápido que o uso dunha pértiga, como se fai actualmente, e que ainda así non permite chegar a niños en certas alturas e require o traballo de varias persoas.
Tras a demostración, o alcalde afirmou que o concello ía adquirir un destes fusiles, cuxo custo é duns 2.000 euros, coa munición incluida.
Segundo dixo Francisco Fumega, o traballo de eliminación destes niños é moi laborioso e supón moitas horas de traballo para os servizos de Emerxencias e Protección Civil, que se perden de facer moitas outras cousas necesarias, polo que o consideraba unha boa adquisición.
Ao respecto, a experiencia contrastada e os resultados acadados en Cantabria e Navarra polos representantes desta empresa, acabou por convencer ao alcalde e aos integrantes de Protección Civil da utilidade deste sistema para loitar con máis eficiencia e rapidez contra a proliferación dos niños de avispa velutina.
