Hoxe temos que lamentar a perda dun gran cineasta e un gran amigo do Carballiño e do Ribeiro: José Luis Cuerda.
Desde o Concello do Carballiño queremos transmitir o noso máis sentido pesar ás súas fillas Elena e Irene, demais familia e amigos. E deixar testemuña da súa fonda pegada na nosa vila e comarca, e nos nosos corazóns.
José Luis Cureda chegou a estas terras no ano 2000 para rodar a curtametraxe Primer amor, e dende entón visitou a nosa vila e comarca unha infinidade de veces, onde pasou moitas tempadas nos últimos vinte anos, tras comprar unha casa en Paradela de Moldes e despois, no ano 2002, un caserón do século XV en Cubilledo-Gomariz, onde creou a adega do seu viño Sanclodio, e onde estableceu a dirección de Produccións A Modiño S.L.
O seu recordo como gran cineasta e intelectual, e sobre todo como persoa comprometida coa cultura e co Carballiño, onde deixa moi boas amizades, permanecerá sempre con nós.
