O Plan Integrado de Emprego do Carballiño “Carbaemprega 2018”, que remata a finais deste mes de outubro, podería ter continuidade cunha terceira edición, tal e como o manifestaron tanto o concelleiro de Turismo, Industria e Comercio, Manuel Dacal, como o alcalde, Francisco Fumega, durante o acto de clausura deste Plan, celebrado este mediodía no salón de plenos do concello, coa asistencia do Director Xeral de Orientación e Promoción do Emprego, Pablo Casal, así como representantes das empresas colaboradoras na formación, Eurofirms, Inneria Solutions e Beproject, ademáis do persoal do servizo municipal de orientación laboral.
Francisco Fumega amosou a súa satisfacción tanto polo desenvolvemento como polo resultado deste último plan, e dixo ao respecto que “realmente é un orgullo contribuir a mellorar a formación das persoas desempregadas e axudar a que inserten no mercado laboral”. Así mesmo, agradeceu a colaboración da Xunta polo financiamento do Plan, e a colaboración das empresas DIZMAR e GRI Towers, e as que levaron a cabo a formación.
Pablo Casal, que recordou que hai uns días visitou a empresa carballiñesa GRI Towers, sinalou que a formación ten moito valor, pois incrementa as posibilidades de empregabilidade, e que por eso é importante que o persoal estea cada vez mais cualificado e mellor formado, facilitando o acceso ao mercado laboral. Tamén resaltou o feito de que estes plans atendan ás necesidades das empresas da cotorna, citando en concreto a GRI Towers e DIZMAR, entre outras. Finamente, incidiu nos orzamentos previstos pola Xunta en materia de formación, e citou en concreto os 5 millóns de euros orzamentados para os plans integrados de emprego cos concellos, do total de 10 millóns de euros establecidos para os Plans Integrados de Emprego de Galicia.
Manuel Dacal expresou o seu compromiso e o do concello a prol da formación dos traballadores e do tecido empresarial carballiñés; agradeceu o labor desenvolvido neste último plan pola Xunta e as empresas de formación, así como polo servizo de orientación laboral do concello.
Finalmente, os representantes de Inneria Solutions e Eurofirms, Eduardo e Belén, respectivamente, resaltaron o papel que lles toca aos alumnos e alumnas que seguiron este plan, para que non decaiga a motivación persoal de cara a acadar un obxectivo concreto, e que sigan fagan uso dos técnicos de ambas empresas.
Ao remate do acto entregáronse os diplomas das prácticas do curso de soldadura.
ÉXITO DO PLAN
Ata 60 persoas xa traballaron durante o Plan Integrado de Emprego do Carballiño “Carbaemprega 2018”.
O Plan Integrado de Emprego do Carballiño, dende o seu inicio en novembro do ano pasado, levou a cabo accións formativas que desenvolveron habilidades para mellorar a procura de emprego e empregabilidade dos demandantes.
Entre as accións impartidas figuran as competencias na procura de emprego con 8 cursos de orientación laboral, un curso de soldadura en colaboración con DIZMAR, Eurofirms e Inneria Solutions, un curso de informática, un de manipulador de alimentos, un de carretilla elevadora e un de prevención de riscos laborais.
Actualmente, parte dos usuarios están a realizar o certificado de profesionalidade de Actividades Auxiliares de Almacén, que pretende dar saída profesional aos alumnos que o cursan.
Á vista están os resultados da formación, procura activa de emprego e tutorización. Ata 60 das 100 persoas que comezaron o programa traballaron durante este período. Neste instante seguen traballando 43 persoas e 30 se consideran xa insertadas.
