Un programa de acción social, promovido pola área municipal de Promoción Económica, que permitiu contratar a tres persoas -dous homes e unha muller-, posibilita que o concello poida efectuar o pintado das farolas de alumeado público do casco urbano. En concreto, xa se levan pintado arredor de cento cincuenta farolas, e continuarase con este labor mentres dure o programa.
Trátase das farolas de fundición que, na inmensa maioría dos casos hai tempo que perderon a pintura orixinal e están incluso oxidadas nalgunhas partes.
O traballo está dirixido polo departamento de obras e supervisado polo servizo eléctrico do concello, que se encargará da substitución das lámparas daquelas farolas que ainda non teñan luminarias tipo led.
Na Avenida do Arenteiro acometeuse o pintado de 58 farolas nas que, nas próximas semanas, tamén se subsituirán as luminarias vellas de mercurio por outras de led. Tamén se pintaron as farolas da ponte de Toscaña. Pola humidade que provoca a cercanía do río, estas farolas eran as que se atopaban en peor estado.
Na rúa San Cibrao pintáronse en total 70 farolas, tamén moi afectadas pola humidade do Carrás. E estes días acometeuse o pintado das farolas da Praza do Emigrante (Pista Roxa), e en días pasados as da Praza dos Irmáns Prieto. Nestas farolas non será preciso cambiar as luminarias, pois xa teñen lámparas led dende o pasado ano.
