O concello do Carballiño renderá homenaxe ao Centro Partido do Carballiño en Bos Aires co gallo dos actos do centenario da súa creación, que terán lugar a próxima semana na súa sede da capital bonaerense. En representación do concello acudirán a estes actos o alcalde, Fancisco Fumega; o concelleiro de Turismo, Manuel Dacal, o portavoz do Grupo Popular, Argimiro Marnotes, e o portavoz do BNG, Xosé Francisco Ferreiro Abelleira.
O Centro Partido do Carballiño en Bos Aires ten programados tres actos para conmemorar o seu centenario. Terán lugar o xoves 15, o sábado 17 e o domingo 18 de novembro, na sede do centro en Vicente López.
O concello reeditou para esta ocasión o primeiro número da revista “Arenteiro”, creada polo Centro Partido do Carballiño en Bos Aires en novembro do ano 1931 e que, entre outros temas, inclúe a convocatoria da primeira asamblea xeral da Sociedade “Hijos del Partido de Carballino” e a primeira directiva que tivo este centro.
Nesta reedición especial, que consta de corenta páxinas, inclúense tamén os saúdas do alcalde e dos portavoces dos grupos da oposición pola celebración do centenario do centro.
Para esta ocasión, o concello editou tamén pins conmemorativos da efeméride do Centro Partido do Carballiño en Bos aires, destacando sobre o escudo da sociedade a celebración do centenario: 1818-1918.
Así mesmo, donarase ao centro un equipamento completo para a coción do pulpo (caldeira, aceiteira, pimenteira, saleiro, gancho e tesoiras), así como pratos de madeira grabados co escudo do centro e o motivo do seu centenario. Todos estes utensilios serán usados polos pulpeiros que viaxan coa delegación carballiñesa para a degustación de pulpo que será ofrecida nun dos actos programados polo centro.
Complementariamente aos actos programados polo Centro do Carballiño, o alcalde e concelleiros manterán diversas reunións co colectivo de emigrantes, así como con outras institucións. Entre elas figura a Fundación Universitaria del Río de la Plata. A instancia do concelleiro Francisco Ferreiro, este concelleiro e o alcalde manterán un encontro con representantes desta fundación co obxectivo de establecer un nexo de colaboración e convidalos a que visiten O Carballiño o próximo ano.
Finalmente, tamén está prevista unha visita á pranta da empresa de aeoroxeneradores GRI.
