O concello do Carballiño está organizando, en colaboración co gaiteiro Óscar Ibañez e a Secretaría Xeral de Política Lingüística, un concerto de homenaxe ao Mestre Vide, autor da música da canción titulada “Carballiño”, considerada como un himno do Carballiño.
A canción “Carballiño” foi composta por José Fernández Vide no ano 1952 sobre letra de Xosé Fariña Jamardo, que daquela era o secretario do concello. Débese á súa excelente relación con esta vila, debida á súa amizade con don Juan Corral, docente exemplar e grande afeccionado á música. De feito, Vide, á fronte do Orfeón Unión Orensana, actuou na consagración do Templo da Veracruz ese mesmo ano, cando ainda estaba a medio facer a torre.
Neste concerto, que se celebrará probablemente no mes de abril no auditorio municipal, ofrecerán unha escolleita de pezas para piano e canto a pianista Noemí Salomón Saavedra e a soprano Anais G. Fernández Cerneira. Entre estas cancións acharase o himno do Carballiño.
Precisamente, a finais do pasado ano, co gallo de celebrarse o 125 aniversario do nacemento do Mestre Vide, editouse un triple CD coa súa obra para piano e canto, que inclúe a canción “Carballiño”. Esta edición compleméntase cun libriño sobre a vida e a obra de Vide, onde tamén figura o texto do himno do Carballiño.
O concello do Carballiño colaborou na edición dos CDs, cuxo escudo figura na carátula do estuche xunto cos de outras institucións e entidades.
CARBALLIÑO
(Xosé Fariña Jamardo)
Na montaña no Ribeiro
O Carballiño foi nado,
paraíso feiticeiro
e saúde do emigrado.
Pobo grande e miragreiro,
de augas que curan os males,
frescas brisas do Arenteiro,
carballeiras e pinares.
Vranear eiquí é dozura,
do corpo groria e contento,
bo clima, moita fartura,
contino divertimento.
Si queres pásalo ben,
vén con nós ó Carballiño,
que é a terra do bo pan,
boa carne e mellor viño.
Non teñas penas, rapaza,
e pon os pés ó camiño,
que para pásalo ben
has de vir ó Carballiño.
Esta canción, que foi aprendida por varias xeracións de carballiñeses e carballiñesas na idade escolar, foi interpretada en diversas ocasións pola Coral do Casino do Carballiño que, de feito, a ten gravada nun dos seus CDs.
