O novo subdelegado do Goberno, Emilio González Afonso, presidiu hoxe por primeira vez a Xunta de Seguridade Local no Carballiño. A este acto tamén asistiron o xefe territorial da Vicepresidencia da Xunta, Manuel Pardo Cid; a xefa de gabinete da subdelegación, Marina Ortega; o alcalde en función, Manuel Dacal; o concelleiro de Seguridade Cidadá, Adolfo Nogueira, e os responsables da Garda Civil, Parque Comarcal de Bombeiros, Policía Local e Protección Civil, ademáis da secretaria do concello.
Na reunión, que tivo lugar no salón de plenos do concello, analizáronse os datos relativos á seguridade cidadá no Carballiño no último ano, destacando os baixos índices delictivos en xeral, e por violencia de xénero, en particular. Ainda así, acordouse non baixar a garda e proseguir coa máxima coordinación das forzas de seguridade, co obxectivo de reducir ao mínimo as situacións de perigo potencial na perpetración de delitos.
Por parte dos representantes municipais agradeceuse o labor que realizan as forzas e corpos de seguridade, así como de Protección Civil e Parque de Bombeiros, para lograr a máxima tranquilidade dos veciños e veciñas carballiñeses, así como dos numerosos visitantes que acuden durante a tempada estival, sobre todo durante a celebración de eventos cunha gran afluencia.
