O magazine da TVG “Aquí Galicia” emitirase este sábado, 15 de setembro, desde O Carballiño con motivo da celebración das festas patronais do San Cibrao.
O programa, que está presentado por Lucía Rodríguez, Juan Fuentes e Bernardo Montaña, realizarase en directo desde a explanada da Veracruz, un escenario privilexiado para difundir as excelencias do Carballiño en todas as facetas.
Así, ademáis de entrevistas e actuacións musicais de todo tipo, o programa emitirá unha serie de reportaxes sobre os aspectos turísticos, culturais e deportivos máis destacados do Carballiño tales como o patrimonio histórico e natural, os balnearios, a gastronomía, a oferta hoteleira e as escolas deportivas e de ámbito cultural, entre outros temas. E actuarán en directo os grupos máis representativos da música popular e folk da vila.
Como é día de feira no Carballiño, non faltarán no programa referencias aos elementos máis característicos desta celebración, como é a degustación do pulpo. E tamén terán unha cabida importante as atraccións e actividades programadas polas festas patronais.
Aquí Galicia é un dos programas da televisión autonómica que require un maior esforzo de medios técnicos e de persoal, xa que na súa realización traballan máis de trinta persoas e móvense unha decena de camións e furgóns.
