A organización fai unha valoración positiva da primeira edición da RomeríaRock Arenteiro que tivo lugar o pasado fin de semana no Carballiño.
O director do festival, Diego Fernández, destaca a entrega de todas as persoas que asistiron ao evento. “Estamos moi satisfeitos coa calidade da produción do evento. A pesar da discreta asistencia, o ambiente festivo e a comodidade dos espectadores fixo que todos quedasen encantados. Cabe destacar o traballo de todos os técnicos e artistas, que conseguiron que a parte musical da RomeriaRock fose perfecta. Tamén faremos autocrítica, escoitando aos nosos espectadores e sendo fieis á nosa filosofía de mellora constante”.
O formato familiar e diúrno continuará. Neste sentido indicou que “Seguiremos traballando para afinar aínda máis a nosa aposta polo rock para toda a familia. Queremos conseguir que veñan máis familias e xente de todos os puntos de Galicia. Ademais, buscamos que a RomeríaRock Arenteiro marque o inicio da tempada de festivais”.
Por outra banda, Diego Fernández quixo dar as grazas a todas as institucións e entidades privadas que colaboraron de forma activa co festival. “Grazas ao Concello do Carballiño, a Deputación de Ourense, Estudo 3, Estrela Galicia, Gadis e Johnnie Walker; sen eles sería moi complicado sacar adiante este proxecto ilusionante”.
