A concellería de Cultura ten programado para este próximo sábado, 31 de marzo, unha función dramática dentro da Rede de Teatros de Galicia. Trátase da obra “O rei morre”, de Eugène Ionesco, que será representada pola compañía Sarabela Teatro no auditorio municipal Manuel María.
O comezo da función está previsto para as 20,30 h., e o prezo da localidade é de 5 euros, que se poderá adquirir na taquilla dende media hora antes do inicio.
SINOPSE:
“Que dean o meu nome a todos os avións, a todas as naves… Que esquezan todos os demais reis, os guerreiros, os poetas! Que non exista máis ca eu en todas as conciencias! Un só apelido para todo o mundo!” “Para que nacín se non era para sempre? Malditos pais”.
Despois dunha noite de esmorga, o fatuo rei Berenguer I, que creou un mundo á súa medida, aparece en escena. Os sons da festa que oímos ao entrar na sala desaparecen, e o monarca dun reino de pacotilla que se cría atemporal, recibe a noticia de que vai morrer. Non quere crelo. Pensa que é un pesadelo e dubida de que ese momento estea preto, polo que non deixa de dar ordes coa soberbia daquel que pensa que controla todo. Asiste así aos últimos momentos da súa vida xunto á súa primeira muller, Margarida, e o seu médico, que intentan conseguir que o rei acepte que está no final da súa vida. Mentres, a súa segunda muller, a raíña María, intenta ocultarlle esta realidade e suavizar a súa agonía, xunto coa enfermeira Xulieta e unha alabardeira, que parecen ser as únicas que saben o que ocorre nese lugar onde nada é o que aparenta.
Ademais dunha visión intimista, á obra pode considerarse unha metáfora da fin do poder, do absurdo dun gobernante con toda a autoridade do mundo, ao que xa non lle serve de nada cando se enfronta á morte.
Ficha artística
Autor: EUGÈNE IONESCO
Dramaturxia e dirección: ANA VALLÉS
ELENCO
FERNANDO DACOSTA: o rei Berenguer I.
FINA CALLEJA: Margarida, primeira muller do rei.
SABELA GAGO: médico real.
NATE BORRAJO: María, segunda muller do rei.
ALFONSO MÍGUEZ: Alfonso, súbdito.
