A empresa que executa o proxecto de mellora da accesibilidade e aparcamento no camping municipal e Museo Etnográfico do Arenteiro ultima estes días as obras.
O novo pavimento do traxecto de sendeiro do río Arenteiro entre a Pena dos Namorados e os muíños do Museo Etnográfico quedou xa rematado, e agora estase finalizando a mellora do aparcamento, que contará con prazas reservadas e adaptadas para vehículos de persoas con mobilidade reducida.
A primeira fase do aparcamento, que está situado nunha carballeira preto da recepción do camping e dos bungalows, xa se completou, e agora só resta pavimentar as prazas reservadas ás persoas con discapacidade e colocar un panel en 2D coa sinalización turística da zona.
Co obxectivo de supervisar a marcha dos traballos, esta mañá percorreron a zona o alcalde, Francisco Fumega, e o concelleiro de Turismo, Manuel Dacal.
O proxecto de mellora da accesibilidade no camping municipal e creación de aparcamento, promovido polo concello do Carballiño, ten unha subvención da Dirección de Turismo de Galicia que cubre a totalidade do orzamento das obras, que é de 48.399,94 euros.
