A Deputación provincial de Ourense ven de notificar ao concello a concesión dunha subvención de 48.000 euros para o proxecto medioambiental de habilitación da canle de auga da fábrica de papel da Lavandeira e convertela nun criadeiro de troitas.
O proxecto, que foi presentado pola Alcaldía en colaboración coa Sociedade de Pesca Deportiva Arenteiro, permitirá a esta sociedade incrementar significativamente a súa capacidade de criar troitas, conxuntamente coa canle que existe dende hai tempo en Toscaña, para repoblar o Arenteiro en tempada de pesca.
O proxecto consiste en recubrir cunha malla metálica a vella canle de agua que discurre pola finca da Lavandeira, con entrada dende o termo da Piscifactoría e saída pola zona da ponte, de xeito que permita criar unha gran cantidade de troitas sen que se vexan afectadas polas aves ou calquera outra circunstancia negativa para o crecemento dos alevíns.
Esta iniciativa, ademáis de contribuir a incrementar a producción de troitas autóctonas para a repoblación do río Arenteiro, que é unha demanda da sociedade de pesca, será un aliciente medioambiental máis que engadir ao conxunto etnográfico e turístico que conforman a Fábrica de Papel e os muíños.
Ao respecto, está proxectado rehabilitar o proceso de norias e mazas cos que se xeneraba a pasta de papel a partir de tecidos de fío, asi como construir unha zona de servizos xunto ao edificio do secadeiro, para ultimar a apertura da fábrica como un magnífico exemplo do patrimonio etnográfico do Carballiño.
