O concello do Carballiño ten previsto construir no campo de fútbol da Uceira unha nova instalación para albergar baños públicos e unha sala de reunións, das que carece ata agora esta infraestrutura municipal.
O proxecto ten un custo global de 48.398 euros, e para a súa execución conta cunha subvención da Vicepresidencia e Consellería de Presidencia da Xunta de Galicia por un importe de 33.878 euros, o cal supón o 70% do orzamento. Esta axuda, que foi notificada hai uns días, pediuna o concello ao abeiro dunha Orde do 18 de decembro de 2018 pola que se establecían as bases reguladoras e se convocaban subvencións para a creación e/ou mellora das infraestruturas, dotacións, instalacións e equipamentos vinculados á prestación de servizos municipais, destinados a concellos de Galicia para o ano 2019.
O resto do orzamento desta nova instalación, 14.520 euros, será asumida con fondos propios do concello.
A nova construcción irá emplazada entre o actual edificio dos vestiarios e a grada.
A instalación deportiva da Uceira tiña unha imperiosa necesidade de contar con servizos públicos, xa que ata agora só hai servizos nos vestiarios para uso propio dos xogadores, pero non hai servizos para uso do público. Así mesmo, tampouco se conta cunha sala onde se podan celebrar reunións, polo que esta nova construcción arranxará estes problemas.
O concello procederá a licitar este proxecto o máis axiña posible, de maneira que poida executarse canto antes.
