A Biblioteca Pública Municipal pon en marcha un programa especial de actividades na sección infantil durante todo o mes de xullo. Este programa, denominado “Mergúllate na Biblioteca”, comezará o próximo luns, 3 de xullo, en horario de 11,30 a 13,00 h., con obradoiros, contacontos, manualidades e teatro, entre outras actividades. Vai dirixido a nenos e nenas de 6 a 12 anos, e desenvolverase todos os luns e mércores ao longo do mes de xullo.
Os martes resérvanse para as visitas dos nenos que estean en campamentos de verán ou ludotecas, e os xoves para actividades con colectivos de discapacitados intelectuais.
Así mesmo, desenvolveranse sesións especiais de contacontos noutros lugares públicos da vila, como a Praza de Abastos ou as piscinas municipais, que terán lugar o martes 11 de xullo e o xoves 20 de xullo, respectivamente, en horario de 12,00 a 13,00, e para as que é preciso inscribirse previamente, pois as prazas son limitadas, 8 nenos e nenas por sesión.
