A concellería de Medio Rural iniciou un plan de mellora de fontes, lavadoiros, tanques e outros elementos do patrimonio etnográfico das aldeas e parroquias. Este plan promóvese a través dun programa de colaboración social co INEM, que permitiu contratar a catro persoas, tres albaneis e un peón forestal.
Trátase de recuperar o medio rural e poñer en valor o seu patrimonio etnográfico, centrado sobre todo naqueles elementos que son de uso común e que se atopan en peor estado. Así, durante tres meses, que é o tempo de duración dos contratos, levaranse a cabo labores de limpeza, selado de gretas e roza da maleza da súa contorna.
O plan comezou en Batallás e Mesego, e continuará por outras aldeas e parroquias da contorna municipal.
O pasado ano levouse a cabo outro plan semellante, rehabilitándose outras fontes, lavadoiros e tanques.
ASFALTADO
Asemade, a concellería de Medio Rural, que dirixe Rosario González, iniciou tamén estes días o asfaltado das estradas e rúas da parroquia de Mouríz. E hai unhas semanas asfaltáronse as de Arcos, dentro dun programa de mellora dos viais da zona rural que continuará noutras parroquias.
