A concellería de Medio Rural que dirixe Rosario González, rematou hoxe a limpeza e rehabilitación da Fonte do Volante, situada no barrio da Uceira. Asemade, tras a realización da análise correspondente da súa auga, os resultados amosan a súa potabilidade, polo que os veciños deste barrio, que acuden con moita frecuencia a coller auga para uso doméstico poden facelo sen perigo de que estea contaminada.
Neste mesmo barrio, procederase de seguido á limpeza doutra fonte que se atopa na área dos xogos infantís, detrás do hotel-restaurante Lecer.
Estes traballos forman parte da campaña de limpeza e arranxo de fontes, lavadoiros e tanques, así como doutros elementos do patrimonio etnográfico, das parroquias e aldeas do municipio do Carballiño. Unha campaña de recuperación e posta en valor da zona rural, pero tamén de desbroce e limpeza de diversas zonas de uso común destes pobos, como prazas e campos de festa.
Dende que comezou esta campaña, a comezos do mes de maio, xa se realizaron un gran número de traballos, e espérase concluir antes de que remate o plan de emprego mediante un programa de colaboración social co INEM, que permitiu contratar a catro persoas, tres albaneis e un peón forestal por un perìodo de tres meses.
