A repercusión mediática da Tapa Xigante de Pulpo, a programación e sobre todo a gran promoción realizada durante todo este ano da LV Festa do Pulpo, auguran unha afluencia extraordinaria de visitantes á vila do Carballiño e ao parque municipal o próximo domingo, 13 de agosto. De feito, cando ainda quedan tres días para o evento, xa están a piques de agotarse as entradas para o xantar do recinto oficial.
A difusión das noticias sobre a Tapa Xigante e a LV Festa do Pulpo deste ano pode cualificarse de histórica, xa que nunca se realizou unha promoción e un seguimento tan masivos como nesta edición. Como mostra, hai que dicir que a páxina do facebook do concello do Carballiño ten neste momento un alcance de máis de 415.000 persoas, superando con moito todos os récords. Os tres spots promocionais de Pescanova nas redes sociais da campaña “Algo se cuece en O Carballiño”, tamén superan neste momento as 600.000 reproduccións. E o impacto da campaña de promoción da Festa do Pulpo de Abanca en todas as súas oficinas e lugares contratados para a súa publicidade é extraordinario, chegando a ducias de miles de persoas en todas as vilas e capitais de galicia.
O martes pasado, a Tapa Xigante de Pulpo foi a máis retransmitida por televisión das sete edicións celebradas. As canles Tele 5, Catro, TVE e TVG realizaron conexións en directo ao longo do día, cunha audiencia de centos de miles de persoas, e outras televisións realizaron reportaxes. Asemade, o evento tivo a maior afluencia de público da historia; vendéronse máis tikes que nunca e a cola das persoas que esparaban para degustar a tapa superaba a praza dos Irmáns Prieto.
Asemade, estes días son numerosas as entrevistas realizadas en directo ou gravadas por cadenas de radio nacionais, galegas e provincias sobre a Festa do Pulpo e a Tapa Xigante.
Todo isto contribúe a que A Festa do Pulpo sexa unha das festas gastronómicas máis populares e con maior repercusión de Galicia.
