A LV Festa do Pulpo do Carballiño será promocionada na Feira Internacional de Turismo de Madrid, Fitur, que se celebra a próxima semana, como un dos eventos destacados entre as festas de Galicia coa denomiación de interese turistico nacional. Para isto, a próxima semana desprazaranse á capital de España o alcalde, Francisco Fumega, e o concelleiro de Turismo, Xosé Manuel Dacal, para participar nun acto, que terá lugar o venres, 20 de xaneiro, por invitación da directora de Turismo da Xunta de Galicia, Nava Castro.
Neste acto exhibirase un video promocional da Festa do Pulpo do Carballiño, de 3 minutos de duración, con imaxes da Tapa de Pulpo máis grande do mundo, da oferta cultural de concertos e actividades de ocio da primeira quincena de agosto e, por suposto, do propio día da festa no parque municipal. Asemade, distribuirase un folleto con información da festa escrito en cinco idiomas (inglés, francés, portugués, español e galego).
O acto está convocado por Turismo de Galicia para os medios de comunicación, touroperadores e axencias de turismo nacionais e internacionais, e nel tamén intervirá o alcalde carballiñés, para presentar e promocionar o evento.
Nestes dias estase ultimando a dedicatoria desta próxima edición, así como algúns dos aspectos máis relevantes do programa cultural e festivo. O obxectivo desta 55 edición é avanzar na consecución da declaración de festa de interese turístico internacional, polo que se otorga un gran significado á dedicatoria da festa, así como á promoción dentro dunha feira de tanta relevancia como é Fitur.
Por outra parte, tanto o alcalde como o concelleiro de Turismo, confirmaron a asistencia á recepción que ofrecerá o presidente da Xunta, Alberto Núñez Feijoo, no stand de Galicia, o mesmo día da celebración do acto promocional das festas galegas de interese turístico nacional, o venres 20 de xaneiro.
