Este ano a praza de abastos celebra o seu 90 aniversario, e tendo en conta que está próxima a conmemoración do Día da Nai, pon en marcha unha campaña de promoción que consistirá nun sorteo de importantes agasallos entre a clientela, que terá lugar o 3 de maio.
Esta campaña leva como eslogan “Todas as nais á Praza” e desenvolverase do martes, 16 de abril, ao venres, 3 de maio. As persoas que merquen na praza durante este período, poderán depositar nunhas urnas os boletos que se lles entregarán en cada posto polas súas compras, para acceder a algún dos 10 premios establecidos.
Estes premios serán: 1 cafetera “Dolce Gusto”, 2 pulseiras de actividade, 2 reloxos, 1 secador, 1 plancha de pelo, 1 teléfono móbil, 1 plancha de asar e 1 caixa de viño Pazo Tizón.
A campaña foi presentada esta mañá nun acto ao que asistiron o alcalde, Francisco Fumega; o concelleiro Manuel Dacal; o presidente da asociación de praceiros, Eligio González; e a representante de Pazo Tizón, Raquel Mouriño.
Francisco Fumega agradeceu o esforzo que realizan durante todo o ano os praceiros para promocionar o mercado municipal, do que dixo era un un lugar onde se podían mercar productos de calidade e cunha atención moi personalizada. Felicitou á asociación e ao seu presidente polo 90 aniversario e por esta nova campaña polo Día da Nai, e animou a veciñanza a seguir mercando na praza.
Eligio González amosou a súa alegría por poñer en marcha esta nova iniciativa de promoción da praza, e agradeceu á clientela a súa confianza durante todo o ano pero especialmente neste tipo de campañas. Ao respecto, destacou a importancia dos premios e a coincidencia coa celebración do 90 aniversario da praza. Tamén agradeceu o apoio do concello.
