A concellería de Medio Rural, que dirixe Charo González, está procedendo á limpeza e arranxo de arredor de medio cento de fontes, lavadoiros e tanques, así como doutros elementos do patrimonio etnográfico, de vintecatro parroquias e aldeas do municipio do Carballiño. Esta campaña de recuperación e posta en valor da zona rural tamén inclúe o desbroce e limpeza de diversas zonas de uso común destes pobos, como prazas e campos de festa.
Dende que comezou esta campaña, a comezos do mes de maio, xa se realizaron un gran número de traballos, e espérase concluir antes de que remate o plan de emprego mediante un programa de colaboración social co INEM, que permitiu contratar a catro persoas, tres albaneis e un peón forestal por un período de tres meses.
Trátase de recuperar o medio rural e poñer en valor o seu patrimonio etnográfico, centrado sobre todo naqueles elementos que son de uso común e que se atopan en peor estado.
As aldeas e lugares nos que xa se realizaron os traballos pertencen ás parroquias de Seoane, Cabanelas, Sagra, Partovia, O Torrón e Madarnás. Neste intre estase procedendo ao arranzo e limpeza das fontes e pobos da Piteira, e despois proseguirase polas parroquias de Longoseiros, Señorín e Santa Uxía. Os pobos nos que se realizaron estas melloras son: Seoane e O Barón; Cabanelas; Sagra, Bouteiro, A Reguenga, A Seara, Miomás e Trigás; A Piteira, A Devesa, Souto, Sobrado, Valeiras e Zafra; Partovia, Porto de Eguas e As Caldas; O Torrón e Centeás; Madarnás, a Medela, A Esgueva e Batallás.
O pasado ano levouse a cabo outro plan semellante, rehabilitándose outras tantas fontes, lavadoiros e tanques.
