A primeira experiencia de “Pequeocio” resultou exitosa. Así o amosan os organizadores tras constatar a asistencia de arredor de mil persoas durante os tres días que permaneceu aberto no pavillón de deportes Paco Chao. Na súa maioría foron nenos e familias de fóra do Carballiño, polo que esta iniciativa complementou á perfección o programa de actividades en Semana Santa.
A maior afluencia produciuse o sábado, cando tivo lugar unha xornada de artes marcíais. A pesaxe dos deportistas realizouse no Aparthotel Arenteiro, incluídos os nenos que gozaron ao sentirse protagonistas. Nesta competición participaron uns 100 deportistas, sendo o deportista revelación Roi Mateo, do ximnasio Madokoan do Carballiño. Tamén estiveron representados os outros ximnasios do Carballiño, así como de Ourense, Xinzo e Poio.
Cada día, ademáis dos xogos con hinchables e manualidades para os máis cativos, desenvolvéronse actividades deportivas e lúdicas. Así, o xoves foi o día do baloncesto, onde participaron 10 equipos. E o venres houbo sesión de patinaxe e master class de zumba na que interviñeron 35 persoas do público, ademáis dos rapaces e repazas.
Por todo isto, os organizadores consideran que esta experiencia foi moi positiva e que se repetirá en vindeiras ocasións.
