As Xociviga 2017 renderán unha homenaxe ao actor Fernando Rey, nado na Coruña o 20 de setembro do ano 1917. Por isto, proxectarase nunha sesión prólogo especial a película de José Luis Cuerda “El Bosque Animado”, na que participou Fernando Rey. A proxección terá lugar na Praza Maior do Carballiño o domingo, 30 de xullo, ás 22,30 h., se o tempo o permite, e en caso contrario, efectuarase no auditorio municipal.
El Bosque Animado filmouse en Sobrado (A Coruña) no ano 1987, obtivo 5 premios Goya e foi nominada á mellor película nos Premios do Cine Europeo (1988). Fernando Rey interpretou o papel de Sr. D´Abondo, un personaxe da nobleza rural de Cecebre.
Para esta homenaxe a Fernando Rey e a proxección, que se realizará en formato Blu-Ray que acaba de sair ao mercado, contarase coa presencia do director José Luis Cuerda.
As Xornadas de Cine do Carballiño desenvolveranse do 31 de xullo ao 4 de agosto no auditorio municipal. Nos próximos días presentarase o cartel e o programa previsto, que inclúe películas de calidade e unha aposta polos novos realizadores galegos tanto en curtametraxes como en documentais, ademáis de dúas exposicións e dúas publicacións de gran interese. Asemade, entregaranse os galardóns correspondentes a esta edición, e haberá actividades na rúa, como un concerto de bandas sonoras.
