As Xociviga 2017 veñen de editar un libro sobre a truculenta historia dunha auténtica pioneira galega da cinematografía española e cubana. Trátase de Mercedes Mariño, nada en Monforte e emigrada a Cuba dende moi pequena, que chegou a protagonizar unha serie de fitos históricos no cine, no teatro, na radio e na canción, e que faleceu xa moi lonxeva en Santiago de Compostela, dun xeito triste e absolutamente esquecida.
Ademáis de recuperar a súa historia neste libro do escritor e crítico cinematográfico Xosé Enrique Acuña, as Xociviga tamén proxectarán esta tarde a película ABEL SÁNCHEZ (España, 1946), protagonizada por Mercedes Mariño, e que fai sesenta anos que non se exhibía.
A publicación, titulada “Estrela e Eclipse de Mercedes Mariño”, foi presentada esta mañá no concello do Carballiño polo alcalde, Francisco Fumega; o autor, Xosé Enrique Acuña, e o secretario xeral de Cultura, Anxo Lorenzo.
Francisco Fumega destacou que era a terceira publicación que se realizaba no marco destas Xociviga e que, polo tanto, supoñía unha gran contribución á recuperación da memoria histórica da cinematografía e da fotografía en Galicia. Referiuse a outras publicacións de anos anteriores, destacando a trascendencia de todas elas. Así mesmo, agradeceu a colaboración da Secretaría Xeral de Cultura e da Consellería de Cultura, e o traballo de investigación levado a cabo por Xosé Enrique Acuña, que foi tamén o autor do libro sobre o crítico de cine Aurelio Pego, publicado o pasado ano.
Xosé Enrique Acuña destacou, sobre todo, os fitos protagonizados por Mercedes Mariño ao longo da súa vida, que foi absolutamente sorprendente tanto na súa faceta artística como na súa truculenta vida persoal. Mariño naceu en Monforte no ano 1909 e morreu en Santiago de Compostela, no psiquiátrico de Conxo, no ano 1995. Foi pioneira en moitas cousas: primeira actriz galega que debutou nun teatro en Nova York, primeira muller galega protagonista no teatro cubano así como no cine mudo cubano, e primeira muller galega que tivo un programa de radio no que fixo teatro radiofónico e comezou a cantar cancións con ritmos propios do jazz, como o foxtrot. Mercedes Mariño retornou a España en 1931, e a partir de aí entra nunha nova etapa a súa vida, colaborando coa República como artista, ata que o golpe de Estado cambia de novo a situación do país e a súa propia, divorciándose do seu marido, que era médico. A partir de 1946 prodúcese o eclipse total e xa non se sabe nada dela. Estivo internada en centros psiquiátricos na Habana e Madrid e morreu de forma moi triste en Santiago, en Conxo. O libro, de 120 páxinas contén ademáis unha parte gráfica con imaxes da vida artística, persoal e familiar da actriz e cantora.
Anxo Lorenzo comezou agradecendo ao autor a recuperación desta figura histórica, dstacando a iniciativa das Xociviga por apoiar este tipo de traballos. De feito, loubou que as Xociviga, que é o decano dos festivais de cine de Galicia, emprendesen o pasado ano este camiño de publicar libros de investigación cinematografica, algo que non fai ningún outro festival, asegurou. De Mercedes Mariño dixo que debe ter o seu lugar na historia cultural de Galicia, e que o esforzo das Xociviga ten moita trascendencia, polo que felicitou ao festival, ao concello do Carballiño e a Xosé Enrique Acuña.
