A Corporación Municipal do Carballiño, quere expresar unánimemente o seu pesar e a máis enérxica repulsa pola morte violenta da veciña Dna. Virginia Ferradás, acaecida na tarde-noite de onte.
Este feito merece a máis absoluta condena, así como unha fonda reflexión acerca da violencia machista, que é unha das lacras deste tempo e que por desgracia se repite con moita frecuencia.
Por isto, é preciso tomar conciencia da necesidade de seguir incidindo na repulsa deste tipo de actos e apoiar todas as iniciativas que se leven a cabo para conquerir a igualdade real dos homes e as mulleres na sociedade e en todos os estamentos, como é a familia.
Para quen conformamos a Corporación Municipal, e en representación de toda a veciñanza do Carballiño, queremos deixar constancia da nosa condolencia á familia e amistades da vítima, e a condena máis firme destes feitos que teñen consternado ao noso pobo, e que non debe repetirse nunca máis.
Con este motivo, o Concello do Carballiño declara o luto oficial durante tres días e fai un chamamento á veciñanza para que asista á concentración que se celebrará hoxe ás 12 da mañá na Praza Maior.