Dúas corais e dúas rondallas conforman o cartel do XXIV Festival de Habaneras, que organiza o Orfeón do Carballiño e que se celebrará o sábado 5 de agosto, ás 20,30 h., no auditorio municipal. Trátase das corais OIHARTZUNA de Vizcaya e do Orfeón do Carballiño, e das rondallas BOHEMIOS de Ferrol e ALFAIA de Cenlle. Asemade, renderase homenaxe a Ernesto Lagarón Vidal, presidente da Unión de Asociacións Galegas en Cataluña, polo seu labor de promoción cultural en Cataluña durante 35 anos.
O evento foi presentado esta mañá polo concelleiro de Cultura, Diego Fernández; o presidente e director do Orfeón, Emilio Rodríguez e Christian Casas, respectivamente, e o tamén directivo desta entidade, Paco Fernández.
Diego Fernández fixo un recoñecemento púlbico ao Orfeón polo traballo que realiza cada ano para encher o auditorio neste festival, así como por promover o nome do Carballiño nas súas viaxes e traer ao Carballiño aos mellores coros de España.
Emilio Rodríguez destacou a andaina levada a cabo dende 1994 cando quixeron render tributo aos emigrantes creando un festival de habaneras, e Christian Casas abondou nesta idea aducindo que polo festival xa teñen pasado 58 agrupacións de Venezuela, País Vasco, Asturias, León, Madrid e de toda Galicia, entre outros lugares.
Ambos destacaron a calidade dos grupos participantes nesta edición. Así, a Rondalla Bohemios de Ferrol ten 40 compoñentes, e acadou numerosos premios por toda España. A Coral Oihartzuna de Vizcaya está formada por 36 voces mixtas e ten participado nos mellores festivais, acadado moitos premios en diversos concursos. Dase a circunstancia de que esta coral permanecerá no Carballiño durante toda a semana grande da Festa do Pulpo. Tamén destacaron a calidade do rondalla Alfaia de Cenlle, unha das poucas que quedan na provincia, e o repertorio que ofrecerá o Orfeón, consistente en catro habaneras e a estrea dunha adaptación dunha parte dunha ópera nunha habanera a 7 voces.
Finalmente, agradeceron o apoio do concello, da Deputación, de Seguros Ocaso e de Cofaro.
