O Festival de Teatro Galego do Carballiño (Fetega) fixo público o programa da súa 28ª edición, que do 5 ao 9 de setembro ofrecerá unha vintena de espectáculos e propostas formativas coa produción galega como protagonista. O concello do Carballiño, a Agadic e a Deputación provincial son os principais patrocinadores do evento.
O Auditorio Municipal e o anfiteatro exterior da praza da Veracruz acollerán a meirande parte das citas desta 28ª edición, que tamén se estenderá ás rúas da localidade e á Casa da Cultura. O Auditorio acollerá do martes ao sábado os espectáculos Eroski Paraíso, de Chévere (día 5); A canción do elefante, de Redrum Teatro (día 6); Dramaturxia das mulheres, de Inherente Teatro (día 7); Impronews, de Triatreros (día 8); e Afiando con humor, de Sergio Pazos (día 9). Este último será, ademais, o encargado de conducir a gala de clausura e de entrega do premios Fetega Dorotea Bárcena a Carlos Blanco o mesmo sábado.
No anfiteatro da praza da Veracruz terán lugar as representacións de Welcome, de Duelirum (día 5); Lila Star, de Vuletos de Rosca (día 6); Escola de saltimbanquis, de Pistacatro (día7); Nono, de Nono Productions (día 8), e Contigüo, de Compañía IO (día 9). Ademais, Barafunda e Pistacatro serán as formacións encargadas dos espectáculos que animarán as rúas do Carballiño durante todos os días do festival.
Como complemento deste programa de exhibición, o Fetega ofrece o sábado na Casa da Cultura a conferencia Teatro posdramático galego, a cargo de Afonso Becerra de Becerreá; ademais de organizar cadansúa clase maxistral sobre improvisación, impartida por Omar Ferrín, e novas linguaxes escénicas, por Avelina Pérez.
