O concello do Carballiño ven de publicar as bases da XXXII edición do Premio Antón Losada Diéguez, organizado polos concellos do Carballiño e Boborás, coa colaboración da Deputación provincial, e que nesta ocasión lle corresponde convocar ao concello carballiñés.
O prazo para poder presentarse a este premio remata o 31 deste mes de xaneiro, e comprende as obras publicadas entre o 1 de xaneiro do 2016 e o 31 de decembro do mesmo ano.
Como é habitual, prémianse obras xa publicadas, establecéndose dúas modalidades, CREACIÓN LITERARIA e INVESTIGACIÓN E ENSAIO, e a cuantía de cada unha será de 6.000 euros.
O fallo dos premios terá lugar o día 22 de abril no concello do Carballiño, e a entrega realizarase no Pazo dos Losada en Moldes o 10 de xuño.
