Esta semana o Cine Club Carballiño desenvolve unha programación especial, con catro películas integradas dentro dun ciclo titulado Escravitudes.
Iníciase o xoves día 9 coa proxección ás 22:00 horas de Manderlay, do director Lars von Trier, unha impecable disección do xénero humano que estivo nominada a Palma de Ouro en Cannes e á Espiga de Plata no Festival de Valladolid no ano 2005. O pase será en versión dobrada ao castelán.
O venres día 10 proxéctase I´m not your negro, sen dúbida un dos mellores documentais dos últimos anos, onde se repasa a historia do movemento afroamericano nos Estados Unidos. Gañadora do Premio ao Mellor documental para a Asociación de críticos de Los Ángeles, nominada á mellor documental nos Oscar e nos premios Gotham, está baseada no libro do escritor James Baldwin. Os pases serán ás 20:00 horas en versión dobrada ao castelán e ás 22:30 horas en VOS.
O sábado día 11 teremos Rebelde, filme canadiano do 2012 que gañou o Festival de Tribeca e estivo nominada aos Oscar no que se nos narra a historia de komana, secuestrada por un exército rebelde nun dos moitos conflictos armados en África. Os pases serán ás 20:00 e ás 22:30 horas, ambos en VOS.
O ciclo péchase o domingo día 12 con El nacimiento de una nación, dirixida por Nate Parker no 2016, gañadora do Premio do Público e do Mellor película no Festival de Sundance. O horario será ás 18:00 (versión dobrada ao castelán) e ás 20:00 horas (VOS).
Todas as proxeccións serán no Auditorio Municipal Manuel María, e o prezo do bono para acceder a cada película será de 3 euros.
