O alcalde do Carballiño, Francisco Fumega, ven de publicar un bando onde anuncia a restricción do rego de xardíns e baldeo de rúas, así como a baixada da presión nocturna na rede urbana, co obxectivo de reducir o consumo de auga ante a grave situación de alerta pola seca. Así mesmo, neste bando, pídese á poboación a restricción do consumo de auga potable para regar xardíns e cultivos.
Neste senso, o rego dos xardíns e espazos verdes públicos xa se pasou do modo automático ao manual, coa finalidade de regar cada dous días e durante cinco minutos, que é o mínimo para poder manter o césped e as prantas sen que sequen, e conseguir así o máximo aforro de auga.
