Os pavillóns de deportes do Carballiño, Cea e O Irixo acollerán este domingo, 28 de mio, a fase de ascenso autonómica de fútbol sala nas categorías infantil e cadete masculino.
En categoría infantil, catro clubes representantes das catro provincias galegas: Club del Mar, campión da Coruña; María Auxiliadora, campión de Lugo; EDC. Celanova, campión de Ourense, e CIOS Vigo Pelucas, campión de Pontevedra, disputarán as semifinais no pavillón do Irixo, ás 11,00 e 12,15 h.
En categoría cadete, os clubes Troula F.S., campión da Coruña; Lumieira F.S., campión de Lugo; Seminario, campión de Ourense, e CIOS Vigo, campión de Pontevedra, disputarán as semifinais no pavillón de Cea, ás 11,00 e 12,15 h.
E xa pola tarde, ás 17,00 e 18,30 h., no pavillón Paco Chao do Carballiño terán lugar as finais cos equipos clasificados.
Debido a gran concentración de eventos deportivos durante esta fin de semana no Carballiño, que manteñen ocupadas as dúas canchas do pavillón Paco Chao durante todo o sábado e o domingo, as semifinales desta fase vanse disputar pola mañá nos pavillóns de deportes de Cea e O Irixo. Por iso, tanto o alcalde, Francisco Fumega, como o concelleiro de Deportes, José Manuel Dacal, agradeceron aos alcaldes e concelleiros de deportes de Cea e do Irixo a deferencia por albergar estes encontros.
O evento foi presentado este mediodía nun acto ao que tamén asistiron Antonio Colmenero, en representación da Federación de Fútbol Sala; Roberto Pires, presidente do Club F.S. Carballiño, e o concelleiro do Irixo, Víctor.
Fumega agradeceu o labor que realizan os clubs e escolas deportivas e que redunda non só en beneficio da infancia e a mocidade, senón tamén da afluencia de xente á vila, notándose sobre todo na hostalería. Así mesmo, agradeceu a colaboración da Federación, Deputación Provincial, Secretaría Xeral para o Deporte e aos concellos de Cea e O Irixo.
Dacal reiterou o mesmo agradecemento e fixo fincapé na posibilidade que se abría con esta colaboración de facer comarca e unirse para compartir eventos deportivos deste tipo con outros concellos. Ao respecto dixo que se non fose por Cea e O Irixo, esta competición non se podería celebrar.
Colmenero destacou o labor do club de Fútbol Sala do Carballiño e asegurou que era unha garantía para que a Federación trouxese este tipo de eventos á vila do Carballiño, xa que significaba un éxito seguro de organización.
O concelleiro do Irixo tamén amosou a súa satisfacción por colaborar e compartir este evento deportivo con Cea e O Carballiño.
Finalmente, Roberto Pires insistiu no agradecemento aos patrocinadores e animou a seguir loitando polo ben da mocidade do pobo.
