Unha exposición de retratos de persoeiros da cultura e da vida pública galega fotografiados por José Luis Abalo dentro e fóra de Galicia, conforman a mostra “Retratos Documentados”, que se exhibe na sala de exposicións do auditorio, no marco das Xociviga.
Isaac Díaz Pardo, Teresa Castelao, Xosé Neira Vilas, Eugenio Granell, Avelino Pousa Antelo, Borobó e Isaac Díaz Pardo son algúns dos persoeiros que figuran nesta mostra.
A exposición, así como o catálogo da mesma, foros presentados polo alcalde do Carballiño, Francisco Fumega; o secretario xeral de Política Lingüística, Valentín García, e o fotógrafo José Luis Abalo.
Francisco Fumega agradeceu ao secretario xeral de Política Lingüística a súa asistencia ao acto e, sobre todo, a súa colaboración para editar o catálogo, e ao fotógrafo José Luis Abalo a súa deferencia por traer a exposición ao Carballiño. É un honor, dixo, contar nas Xociviga con esta mostra sobre persoeiros tan destacados do galeguismo.
O fotógrafo José Luis Abalo, nado en Caracas pero residente en Galicia dende finais dos anos oitenta, explicou a xénese desta serie de retratos, centrado e persoas de idade avanzada vencellados co galeguismo. Asemade, considerou un privilexio retratar a todas estas persoas e amosou o seu agradecemento ás Xociviga, ao concello e ao secretario de Política Lingüística.
Finalmente, Valentín García destacou a aportación para a memoria histórica de Galicia das imaxes desta mostra, ensalzando a iniciativa e a relevancia sobre todo de cara ás novas xeracións.
Desta exposición editáronse 500 catálogos, que foron editados polas Xociviga en colaboración co concello do Carballiño e a Secretaría Xeral de Política Lingüística.
