O Boletín Oficial da Provincia de Ourense publica un extracto das bases da convocatoria de axudas para facilitar a localización e consolidación en espazos de coworking aos emprendedores.
Esta novidosa iniciativa impulsada pola concellería de Promoción Económica, que dirixe Adolfo Nogueira, ponse en marcha para promover o emprendemento como modelo de dinamización económica e para crear emprego.
O obxecto destas bases é regular as condicións que rexerán a concesión de axudas, en réxime de concorrencia competitiva, dirixidas a facilitar ás pequenas empresas de recente creación, a localización e consolidación en espazos de coworking situados no municipio do Carballiño.
Entre os requisitos que se esixen a estas empresas figuran: que o domicilio social e fiscal sexa no concello do Carballiño, e estean dadas de alta no IAE, con menos de catro anos de antigüidade; non dispoñer de locais en propiedade para o desenvolvemento da actividade; non estar vinculadas ou participadas en máis dun 25 por cento por empresas que non reúnan algún dos requisitos anteriormente expostos, e presentar un plan de empresa viable da actividade que se pretende desenvolver (descrición da mesma, mercado ao que se dirixe, previsión de investimento e de creación de emprego, financiamento, cadros financeiros provisionais).
