O concello do Carballiño pechou hoxe o ciclo de reunións que está a manter con representantes do tecido económico da vila, para coñecer as principais inquietudes e necesidades destes sectores na actual situación de desescalada polo control da propagación do covid-19.

Onte reuniuse cos comerciantes e hostaleiros, e esta mañá a quenda correspondeulle aos empresarios do polígono industrial da Uceira e do parque empresarial.

A esta reunión, que tivo lugar no salón de plenos do concello, asistiron, por parte do concello, o alcalde, Francisco Fumega, e o concelleiro de Promoción do Emprego, Manuel Dacal, así como e a concelleira de Comercio, Silvia Varanda. Por parte do sector, estiveron o presidente da Asociación de Empresarial do Polígono da Uceira, Manuel Carballeda; o xerente de GRI Towers Galicia, Cándido González, xunto con outro directivo da empresa; e o xerente da empresa DIZMAR, Carlos Rivas.

Tamén asistiron as asesoras laborais do concello e o representante da empresa Infoxiro.

Os empresarios comunicaron que están a adoptar todas as medidas de seguridade para evitar posibles contagios polo covid-19, e expresaron a necesidade de que as administracións públicas competentes deben especificar mellor as normativas para as empresas neste período de desescalada polo control da propagación do virus.

Tamén se analizou a posbilidad de que por parte das administracións públicas póidanse conceder axudas para instalar cabinas de ozono para a desinfección, co obxectivo de incrementar as medidas de prevención nas empresas.

Así mesmo, acordaron co concello intensificar a limpeza da contorna e delimitar mellor as zonas de aparcamento próximas ás rotondas para facilitar os xiros dos grandes vehículos de transporte. Tamén se acordou intensificar a eliminación de niños das avespas velutinas, que están a proliferar nesta primavera.

PRODUCIÓN AO CENTO POR CENTO Por outra banda, os xerentes tanto de GRI Towers Galicia como de Dizmar, que son as dúas grandes factorías do polígono e parque empresarial do Carballiño, e que contan cos persoais de traballadores máis numerosas, aseguraron que neste momento, e a pesar da pandemia mundial que se está padecendo, atópanse nun punto álxido da súa produción, e que mesmo precisan máis persoal cualificado, polo que insistiron na necesidade de seguir desenvolvendo cursos de formación encamiñados a cubrir esta deficiencia.