O Centro Comercial Aberto retoma este venres, 19 de xuño, a súa actividade de dinamización comercial cunha campaña sinalada por descontos nos comercios, sorteo de vales de compra, agasallos e tapas en locais de hostalería

Como se viña anunciando desde o luns, algo ía acontecer no Carballiño este venres e soubémolo onte por un comunicado da Asociación Carballiño Centro Comercial Aberto. Pois ben, chegou a noticia:

Este venres 19 de xuño, celebrarase de novo o SHOPPING DAY (DÍA ESPECIAL DAS COMPRAS) no Carballiño. Con esta nova edición do evento, a Asociación Carballiño Centro Comercial Aberto retoma as súas campañas de dinamización pero con cambios e sempre adaptándose á situación actual. Respectaranse todas as medidas de seguridade nos establecementos participantes, e nesta ocasión non haberá pasarela de moda, nin animación de rúas por mor da separación e para evitar posibles aglomeracións.

Os establecementos participantes son un total de 43, dos cales 36 son comercios que ofrecerán aos clientes descontos e promocións en artigos de tempada, ampliando o horario ata as nove da noite; e 7 son establecementos hostaleiros que colaboran agasallando tapas a cada cliente que cando merque nos comercios recibirán una invitación para dita degustación.

Como en edicións anteriores, e continuando coa dinámica da Asociación Carballiño Centro comercial Aberto, premiarase a fidelidade dos clientes, os cales unha vez realicen a súa compra conseguirán unha papeleta de participación para un sorteo que se realizará o mesmo día as 21:30 h., de 300€ en vales de compra, de 50€ cada un, e tamén sortearanse dous tratamentos de beleza e estética. Ademais, unha vez acudan a depositar dita participación na hurna do CCA, situada na Praza Maior, recibirán unha bolsa reutilizable da Asociación Carballiño CCA.