O Cine Club retomará en setembro as proxeccións habituais, e en xullo programará o ciclo flores de cinema

O Cinema Club Carballiño comunica que despois de diversas deliberacións e dúbidas decidiu atrasar ata setembro as proxeccións habituais dos venres no Auditorio Municipal Manuel María. A última proxección foi o día 6 de marzo, e a partir desa data xa non se proxectou máis. “Cremos que o máis prudente de momento é esperar a que se normalice toda a situación sanitaria, desexando que en setembro podamos volver ao noso traballo habitual. Estamos a preparar a nosa volta para primeiros de setembro, tan pronto o Auditorio estea libre e en condicións idóneas de seguridade”, segundo din nun comunicado.

En canto ao verán, anuncian que farán un ano máis “Flores de Cinema, no mes de xullo, en datas que se están concretando xa que dado que vai haber varias sesións de cinema ao aire libre a cargo do Concello imos coordinar con eles para que as nosas ofertas sexan complementarias. Cando teñamos pechadas datas e películas mandarémosvos máis información”, segundo anuncian.

Por último, como medida de axuda e solidariedade cos máis de 50 socios colaboradores que nos apoian economicamente cada ano, independentemente de como se viron afectados polo Covid-19, decidimos AGASALLAR a cota de 30€/ano aos devanditos socios da próxima tempada 2020-2021 mantendo a publicidade que facemos nas fichas dos filmes.