Veciños, grupos de amigos e familias participaron nunha nova edición da iniciativa “Pon unha foto na rúa”

A Asociación Fotográfica O´Potiños, en colaboración co concello do Carballiño, organizou este domingo, 28 de xuño, unha nova edición da iniciativa “Pon unha foto na rúa”, que se desenvolveu cun gran éxito, según dixo o presidente do colectivo, Manuel Blanco.

Tratábase de convidar aos veciños da vila, ben individualmente, con amigos ou en familia, a participar nesta experiencia que se celebra a nivel mundial como un acto de promoción da fotografía, deixándose fotografar polos integrantes da asociación.

Para isto, a floristería Arual instalou un set con dúas cadeiras de mimbre e unha decoración naturalista fronte ao monumento á pulpeira da Praza Maior, onde, tras desinfectarse en cada toma, foron posando os protagonistas.

O evento comezou pola mañá e proseguiu pola tarde, ata as 20,00 h.

Estas fotografías serán reveladas posteriormente e comporán unha exposición que se exhibirá en diversos lugares do Carballiño e despois se lles entregará como agasallo ás persoas que participaron.

Como complemento desta actividade, tamén se levou a cabo na mesma praza unha mostra fotográfica dos integrantes da asociación de pasadas edicións e outros eventos fotográficos.

Así mesmo, dende o pasado luns, tamén na parte alta da Praza Maior, exhíbense dezaseis fotografías de gran tamaño, de personaxes do Carballiño, reproducidas en lonas e colgadas en catro expositores. Os retratos chaman a atención pola calidade das fotografías e as súas dimensións.

“Pon unha foto na rúa 2020” é a primeira actividade cultural que se desenvolve no Carballiño desde a declaración da pandemia polo covid 19.