O concello do Carballiño renderalle unha homenaxe ao párroco recentemente xubilado, José Benito Sieiro González, este xoves, 17 de setembro, festividade de San Cibrao, ao termo da celebración da misa na honra do patrono do Carballiño. Estes actos terán lugar no templo da Veracruz. No acto de homenaxe o alcalde faralle entrega ao párroco xubilado dunha placa así como dunha reproducción en miniatura do templo da Veracruz.

CONCERTO DE LUAR NA LUBRE NA INSUA DOS POETAS

Debido á pandemia non haberá actos festivos durante estes días pero, dependendo das condicións metereorolóxicas, está previsto que se celebre na Insua dos Poetas o mércores 16 o concerto de Luar na Lubre.

Este evento está organizado pola Fundación Insua dos Poetas e conta o patrocinio da Xunta de Galicia, así como a colaboración da Deputación Provincial de Ourense e do Concello do Carballiño.

Terá lugar ás 19,00 h., con entrada libre ata completar o aforo. Será obligatorio o uso de máscara e o lavado de mans con xel hidroalcólico.

A apertura das portas terá lugar ás 18,00 h.

Luar na Lubre ofrecerá un concerto no que interpretará os temas do seu último dobre CD VIEIRAS E VIEIROS. HISTORIAS DE PEREGRINOS.

Trátase do 19º disco da banda, no que exploran os escritos, as lendas, as sonoridades e as pegadas que os peregrinos deixaron a través dos múltiples carreiros que conforman o Camiño de Santiago ao seu paso polo territorio galego. O factor humano da vía xacobea é o fío que tece un relato plural que abarca diversas épocas, voces e contextos.

Luar na Lubre naceu en 1986 na Coruña co obxectivo de dar a coñecer a música e a cultura galega. Despois de tres décadas de traxectoria, 18 discos publicados e máis de 1.500 concertos, o grupo, unha referencia a nivel internacional da música folk, situou a Galicia nos escenarios de máis de 30 países de todo o mundo.

A constancia e a fidelidade ao universo folk definen, desde os seus inicios, o traballo de Luar na Lubre. Desde a publicación de O son do ar (1988), tema que chegou a versionar Mike Oldfield, o grupo procurou o seu propio son, tendo como inspiración principal a música galega. Hoxe en día, cunha identidade propia recoñecida e consolidada, a música de Luar na Lubre forma parte non só do imaxinario, senón do patrimonio colectivo.

GRUPO FOLCLÓRICO CANTIGAS E AGARIMOS

Asimesmo, queda aprazada por causa da mela previsión meteorolóxica a actuación prevista para o venres, 18 de setembro, do grupo folclórico Cantigas e Agarimos no auditorio da praza da Veracruz.