A parada de taxis da Alameda regresa á sua ubicación habitual, polo comezo do transporte escolar
9 Setembro, 2020
O Cine Club abre a nova tempada este venres coa película española “Intemperie”
11 Setembro, 2020
O 5º festival "Outros países, Outras músicas" congrega este sábado no Templo da Veracruz aos coros Campo Lameiro, Ludus Tonalis e Música Viva
A Coral Polifónica Campo Lameiro, de Pontevedra; o Coro de Cámara Ludus Tonalis, da Coruña, e o Coro de Cámara Música Viva do Carballiño, conforman o cartel do 5º Festival Outros Países, Outras Músicas, que promove o coro Música Viva, en colaboración co Concello do Carballiño, a Deputación Provincial de Ourense e a Federación de Corais de Galicia.
O evento celebrarase no templo da Veracruz este sábado, 12 de setembro, ás 20,30 h., e contará con todas as medidas de separación e seguridade polo coronavirus.
Ao respecto, o presidente do Coro Música Viva, Antonio Rey Cornide, asegurou que se establece un protocolo estricto, como é gardar a distancia entre coralistas de 1,5 m, e entre os coros e o público de 3 m, así como o uso de xel hidroalcólico para o lavado de mans do público, uso de máscara e separación.
O evento foi presentado esta mañá polo concelleiro de Cultura, Diego Fernández, e Antonio Rey Cornide.
Diego Fernández destacou a consolidación deste festival no calendario cultural do Carballiño, así como o feito de que se poidan escoitar músicas de todo o mundo nun marco inigualable como é o Templo da Veracruz. Agradeceu e felicitou ao Coro Música Viva polo labor que desenvolve e, sobre todo, polo esforzo que supón organizar este festival en tempo de pandemia. Ao respecto destacou o protocolo minucioso de prevención establecido pola organización.
Antonio Rey amosou o seu orgullo de que O Carballiño poida presumir de festival, que cada ano eleva a calidade dos coros participantes. Neste senso destacou ao coro Campo Lameiro, dirixido por Sofía Bouzada Pérez, cun bagaxe importante dentro e fóra de Galicia, a ao Coro de Cámara Ludus Tonalis da Coruña, dirixido por Ruper Twine, ademais do coro Música Viva, que dirixe Miguel Sáez Sotelo.
Son formacións de cámara de arredor de 12 ou 13 membros, o que facilita a separación entre cantores para poder gardar a distancia establecida no protocolo de prevención e seguridade ante o covid 19.
Os tres coros interpretarán seis temas cada un, que serán moi variados, contribuindo a que o festival sexa ameno.
