Suspendida a taxa de terrazas e postos de pulpeiras ata finais do 2021

A Corporación de Carballiño aprobou no pleno desta mañá a modificación de dúas ordenanzas fiscais mediante as que se suspenderá a cobranza de taxas ata o 31 de decembro de 2021 pola ocupación da vía pública. Desta medida beneficiaranse os hostaleiros, que quedarán exentos de pagar pola ocupación con tarimas e terrazas, e tamén as pulpeiras pola instalación de caldeiras. Así mesmo, beneficiará aos postos de venda ambulante, espectáculos, atraccións ou actividades de recreo, así como industrias da rúa ou rodaxes cinematográficos. O Concello deixará de ingresar por este concepto sobre 30.000 euros. A exención destas taxas non se aplicará durante as celebracións da Festa do Polbo e Festas do San Cibrao, cuxos postos, xa sexa barracas ou de venda, deberán abonar o prezo correspondente.

A Corporación tamén aprobou o convenio co Concello de Maside e Chan Empresarial do Atlántico para poñer en marcha o proxecto de ampliación da área industrial. O obxectivo é tramitar a inclusión no plan de áreas industriais de Galicia para proceder a elaborar un proxecto sectorial.

Ademais, aprobouse unha moción de Espazo Común para instar ao Sergas para repoñer o Centro de Orientación Familiar. Con todo, outra moción deste grupo reclamando ao goberno local a contratación de obras na vila foi retirada, co compromiso de que efectivamente o concello priorice as compras no Carballiño.

Finalmente, aprobouse unha moción do BNG sobre o Día Internacional pola eliminación da violencia contra as mulleres.