O restaurante-bar do Muíño dás Lousas podería entrar de novo en funcionamento nos próximos meses, tras procederse á súa licitación. O proceso de contratación administrativa desta instalación municipal culminarase en breve, pois o prego para a súa licitación xa está finalizado e será levado ao próximo pleno municipal para a súa aprobación.

Esta instalación hostaleira, que forma parte do conxunto do Parque Etnográfico do Arenteiro, leva varios anos sen funcionar e a súa posta en marcha supoñerá un aliciente máis para este conxunto de gran interese turístico e etnográfico do Carballiño.

Coa finalidade de que poidan optar o maior número posible de propostas, establécense unhas condicións moi favorables para os interesados, xa que a licitación partirá dun canon anual de 404,88 euros pola explotación esta instalación.

Os aspirantes deberán facerse cargo do acondicionamento do tellado así como da reforma e equipamento do interior. O arranxo do tellado está orzado en 13.809 euros. O Muíño dás Lousas dispón de 92 prazas, 42 no comedor, 32 na terraza e 20 no bar. Entre as condicións fixadas polo concello figura que o adxudicatario terá que mantelo aberto polo menos durante os tres meses do verán, e na valoración á hora de elixir propostas, a oferta económica (polo sistema de poxa sobre o canon mínimo anual) supoñerá o 75% da puntuación, mentres que o tempo de apertura ao público supoñerá o 25% restante.

Unha vez que o pleno aprobei o prego de bases para a concesión será publicado na plataforma do perfil do contratante para poñer en marcha a licitación.