O Carballiño conta actualmente con case medio millón de metros cadrados de espazos verdes, sendo o parque municipal e as ribeiras do río Arenteiro as zonas con maior biodiversidade e de maior interese.

No Día Mundial do Medio Ambiente, que se celebra este venres, 5 de xuño, e que nesta edición está dedicado á conservación da biodiversidade, o concello quere resaltar o esforzo que supón o mantemento dos espazos verdes.

En concreto, cabe destacar o parque municipal, de 32 hectáreas, que está a piques de cumprir o centenario da súa creación, e que é un dos parques máis sobresalientes de Galicia, pois conta cunhas 140 especies botánicas catalogadas ademais dunha importante colonia de aves e de especies piscícolas.

Hai especies de grande singularidade, como son dous grandes secuoyas ( Secuoia sempervirens), os Eucalyptus globulus da entrada, varias especies de cipreses impoñentes, un exemplar de Eucalytus ovata, probablemente o único en Galicia, túas xigantes e piñeiros de oregón, así como ginkgos, liquidámbar, carpes, arces, carballos americanos, chopos, tilos, castiñeiros ou bidueiros. E doutro lado, resaltan os carreiros do río Arenteiro, desde a Ponche de Veiga ata a Ponterriza, e mesmo ata Castro Cavadoso, pasando pola Piscifactoría e o Parque Etnográfico, cunha paisaxe característica de ribeira fluvial. Así como o roteiro do Camiño dos Arrieiros, con tramos á beira do río Carrás.

Trátase dun conxunto de zonas naturais, que requiren un esforzo notable de mantemento, e que lle outorgan ao Carballiño un lugar preferente na conservación de espazos naturais, e que poden gozarse durante calquera época de ano.